تجربتي في البرازيل سعر تذكرة السفر الى البرازيل وتكلفة السفر الى البرازيل

تجربتى فى البرازيل

تجربة السفر الي البرازيل

كنت عايز ازور امريكا اللاتينية من زمان وجت فرصة انى ازورها وكنت عايز اروح كولومبيا بالذات ومحدش يسئلنى اشمعنى
كولومبيا 

لما سئلت عن فيزا كولومبيا لقيت انها محتاجة ورق اكتر رغم انها ممكن تكون فيزا سهلة ومكنش فى وقت عندى انى اخلص الورق دة

ففكرت فى البرازيل ورقها اسهل زى اى فيزا لكن ممكن تكون اصعب فى الحصول عليها شوية

بس كنت قلقان من السرقة والتثبيت اللى كله بيتكلم عنها فى البرازيل والصراحة شوفت فيديوهات قديمة تخوف من البرازيل بس قلت برضه هروحها

جهزت الورق والحمد الله اخدتها بعد 4 ايام من التقديم ب 80دولار وورقها زي اي ورق في اي فيزا بترفعه سكان علي موقع السفارة وبتطبع ابليكشن وتاخده مع نسخ الورق وتروح تقدم في مقر السفارة من غير معاد مسبق وبتدفع في فرع بنك cib اللي تحت السفارة

وحجزت الطيران ودة اغلي حاجة في السفرية كلها وطيرت على ريو دى جانيرو 24 ساعة من مصر بترانزيت 7ساعات دبي

وانا فى الطيارة قابلت واحدة برازيلية قالتلى شوية نصايح عن البرازيل ومنها انك خليك ذكى وخلى الموبايل فى جيبك وحاول متمشيش لوحدك وفى اماكن متروحهاش فزودت من قلقى شوية وقالتلى انى شكلى برازيلى ودة نقطة هتساعدنى هناك

شوية وقالتلى متنساش

sun Block

mosquito protection

لان فى امراض كتيرة موجودة هناك ممكن تتنقل عن طريق الناموس

قبل ما أسافر أخدت تطعيم الحمى الصفراء للبرازيل لكن محدش سئلنى على ورقتها وانا مسافر خالص زى ما بعض الناس كانت بتقول.

ريو دى جانيرو فيها شاطىء كوباكابانا من اشهر شواطىء العالم وشاطىء ابانيما قريب من كوباكابانا وممكن تروح الاتنين على رجليك شواطىء جميلة وكبيرة وتقدر تستمتع بيها جدا

اخترت هوستيل فى ابانيما وحجزت فيه

كانت اول تجربة ليا فى هوستل وكانت تجربة اكثر من رائعة اتعرفت على ناس كتير خلال الاسبوع اللى قضيته هناك من جنسيات مختلفة بنتين من فرنسا وشباب من الارجنتين وشاب من فنلندا وشاب من صربيا وشاب من فرنسا وبنت من البرازيل وبنت من بريطانيا وخرجت معاهم وضحكنا ولعبنا كورة واكلنا مع بعض وروحنا اماكن night life مع بعض كانت تجربة جميلة جدا

واكتشفت ان كل الكلام عن عدم الامان والسرقة فى البرازيل اوفر شويتين لقيت عربيات شرطة فى كتير من الشوارع ونزلت باليل ولوحدى وكنت ماشى فى شوارع فاضية وصورت فيديوهات كمان وروحت Night life

ومحصلش اى حاجة معايا او حتى شوفت موقف حصل قدامى كانت الدنيا طبيعية والشعب البرازيلى جمال جدا ومجانين رقص وغنى وضحك فى كل مكان

المشكلة الوحيدة اللى قابلتنى هيا البرتغالى نادرا ما تلاقى حد منهم بيتكلم انجليزى كله برتغالى وممكن اسبانى شوية

زورت اشهر تمثال فى ريو دى جانيرو

Corcovado (Monte Cristo)

عشان تطلع للتمثال فوق الجبل بتروح لمحطة اسمها كوركوفادو وبتاخد من هناك قطر كهربائى بيطلعك فوق القطر رايح جاى ودخول منطقة التمثال كله ب 65 ريال برازيلى.

في منطقة اسمها فافيلا الشرطة ملهاش تحكم عليها منطقة فقيرة ليهم قوانينهم الخاصة وفيها عصابات واسلحة في مرشد بيقدر ياخدك جولة جواها تشوف شوارعها وطريقة عيشتهم وبيبقي معروف لاهل فافيلا وبيتبرعوا بجزء كبير من اجر الجولة لجمعيات خيرية في فافيلا .

لابا او الداون تاون لريو دى جانيرو دة بالنهار فيها اماكن تاريخية تقدر تاخد لفة فى الاماكن دة مع مجموعة سياح ومرشد يكلمكم على تاريخ مدينة ريو وتاريخ الاماكن دة عن طريق حاجة اسمها Free Walking Tour Rio de Janeiro

ليهم صفحة على الفيس بتقدر تروح معاهم ودة ملهاش سعر بتدى المرشد فى اخر الجولة اى مبلغ عايز تديه لازم تزور برضه اشهر سلالم فى البرازيل واللى مايكل جاكسون وكتير من المغنيين صوروا كليبات ليهم عليها ودة سلالم Escadaria Selarón

سلالم معمولة بقطع من السيراميك بالوان مختلفة وعليها قطع سيراميك بتمثل كتير من دول العالم ودة عملها الفنان التشيلى سيلارون وحول المكان دة من مكان خطير امنيا سابقا لمكان فنى سياحى الاف السياح بتزوره يوميا.

• شاهد ايضا
• 17 نصائح للمسافرين وبيستخدموا بطاقات الائتمان او الخصم
• نتحدث عن تجربتي السفر في روسيا و السياحة في موسكو
• التقرير الشامل عن رحلتي لجزيرة بوكيت

لو بتحب النايت لايف يبقى منطقة لابا باليل هتشوف الجنان بعنيك من شعب بيحب الرقص والغنى جدا وهتسمح موسيقى الفانكى البرازيلية وهتشوف رقص البرازيلين عليها

التكلفة السفر الي البرازيل والاسعار

الاسعار فى البرازيل تعتبر غالية بالمقارنة بدول تانية

الريال البرازيلى بحوالى 4 جنيه والدولار بحوالى 4 ريال برازيلى

الاكل بيتراوح ما بين 30 -50 ريال برازيلى

وجبة ماكدونالدز بحوالى 30 ريال

المواصلات انسب حاجة اوبر وارخص من التاكسى الاصفر اللى هناك

اوبر من المطار لمنطقة كوباكابانا من 40 ل 50 ريال

متوسط التنقل باوبر داخل ريو من 20 ل 50 ريال برازيلى

فى الاخر انطباعى

انا اتبسطت جدا فى البرازيل وخاصة ريو ولازم لازم ازورها تانى طبيعة جميلة وشعب أجمل

فيديو جوله في شوارع البرازيل