شروط الحصول على فيزا سياحية لتركيا

اجراءات الحصول علي فيزا السياحه التركيا

 حاولت اجمعلكم كل الاجابات عن كل الاسئله اللي في دماغكم بخصوص فيزا تركيا
تأشيره تركيا ليها حالتين
الحاله الاولي : لو كان عمرك أقل من 20 أو أكبر من 45 , فمش هتحتاج تعمل تأشيرة من السفارة , لكن هتعمل تأشيرة الكترونية من علي موقع السفاره
وبتدفع رسومها بالفيزا كارد ومن شروطها انك تسافر علي طيران التركيه او مصر للطيران او بيجاسوس
ولو معاك شنجن ساريه او امريكا ساريه ( شرط انها تكون ساريه وقت دخولك تركيا ) بتدخل تركيا يأما بفيزا من المطار من خلال ماكينات مخصصه في مطارات تركيا
يأما بفيزا الكترونيه
ودة الموقع اللي بتعمل من عليه الفيزا الالكترونيه https://www.evisa.gov.tr/en/ 
================================================
الحاله التانيه : لو عمرك اكبر من 20 واقل من 45 ف هتحتاج تأشيرة من السفاره
وهنا هتنقسم علي حسب ايه اللي مكتوب في باسبورك
1- لو مكتوب طالب او حاصل علي مش هينفع تقدم علي تأشيرة سياحه عاديه وهتحتاج تقدم علي تأشيرة زيارة عشان تعرف تطلع التصريح الامني من مجمع التحرير
وتأشيرة الزياره لازم دعوة من شخص تركي
وعشان تطلع الدعوة يأما تطلعها من اي شركه سياحه ب 100 دولار يأما تطلعها مع ايزيك تركيا ب 1400 جنيه بس
( بس خلي بالك كويس اوي لو طلعتها مع ايزيك تركيا وارد جدا جدا متعرفش تطلع اقامه سياحيه وانت هناك لانهم بيغلسوا علي بتوع ايزيك تركيا في الاقامه السياحيه هناك )
.
لو انتي بنت ومكتوب في باسبورك حاصل علي او طالبه ممكن تطلعي فيزا مرافق مع زوجك او ابوكي أو اخوكي
بس بشرط لو هتسافري من مصر ( بكرر من مصر بالذات ) لازم زوجك أو ابوكي أو اخوكي يكون مسافر معاكي من مصر .. عشان تقدرى تطلعى تصريح أمنى مرافق للزوج
.
يعني لو متزوجه مثلا وعايزة تطلعي فيزا مرافق
هيكون مطلوب من الزوج :
كشف حساب بنكي لاخر 6 شهور , جواب من جهه العمل ( أو السجل التجاري والبطاقه الضريبيه ) , حجز فندق وطيران مبدئي , تأمين للسفر من اي شركه تأمين , الباسبور و صورتين مقاس 4 في 6 .. ودة بشرط ان الزوج يكون مثبوت في باسبوره مهنه عشان يعرف يطلع تأشيرة السياحه العاديه
اما انتي هتكتبي فى الابليكيشن تأشيرة مرافق وهيكون مطلوب منك باسبور و صوره شخصيه و تأمين سفر فقط
.
2- لو مكتوب في باسبورك مهنه , ف انت هتقدم علي تأشيرة سياحه عاديه من غير دعوة ولا أي حاجه
وهتحتاج الاوراق الروتينيه العاديه : كشف حساب بنكي لاخر 6 شهور , جواب من جهه العمل , حجز فندق وطيران مبدئي , تأمين صحي للسفر , الباسبور و صور شخصيه
بعد ما تملي كل البيانات علي موقع السفاره هتحجز معاد , وترفع الورق المطلوب منك وتجهز كل الورق الباقي وتروح بيه السفاره
سعر التأشيرة الالكترونيه حوالي 21 دولار امريكي
سعر التأشيرة السياحيه سنجل 60 دولار امريكي , مالتي 195 دولار
سعر التأشيرة الزياره سنجل 60 دولار امريكي + ( الفلوس اللي هتدفعها لشركه السياحه عشان الدعوة )
ودة موقع السفاره https://www.konsolosluk.gov.tr و الفيزا بتاخد حوالي اسبوع عمل وبتطلع بعدها وبتروح تستلمها
وبعد ما التأشيرة ما تطلع تروح بيها المجمع بتاع التحرير الدور الأول مكتب رقم 15 عشان تطلع التصريح الامني
================================================
عايز اسافر تركيا ركز بقي معايا عشان كل اللي فات دة مش مهم المهم اللي جاي ازاي اسافر تركيا
الاوراق المطلوبه للتصريح اللامني :
في 4 حالات ليها :
1- في حاله فيزا الزيارة مطلوب منك الباسبور و صورته و صورة الفيزا
2- في حاله وجود مهنة في الباسبور يعني فيزا سياحه عاديه مطلوب منك برنت تأمينات مختوم و جواب HR مترجم بالعربي و صورة الباسبور و صورة الفيزا
اما لو انت مهنتك اللي في الباسبور ليها نقابه وهي مهنه نقابيه يعني زي دكتور مهندس محامي الخ الخ ممكن متقدمش برنت تأمينات اصلا ولا اتش ار ليتر ويكفي فقط كارنيه النقابه
3- لو انت معاك فيزا امريكا ساريه او شنجن ساريه وطلعت الفيزا الالكتروني ومكتوب في باسبورك مهنه او حاصل علي تقدر تطلع التصريح بالفيزا الاونلاين عادي
4- لو انت معاك فيزا امريكا ساريه او شنجن ساريه وطلعت الفيزا الالكتروني لكن مكتوب في باسبورك طالب مبتقدرش تطلع التصريح بالفيزا الاونلاين ولازم تكون فيزا زياره
( من الاخر بتاع المجمع قالها لو انت طالب حتي لو وقفت علي راسك برضو لازم فيزا زياره حتي لو كان معاك فيزا كوكب زحل وكوكب بلوتو برضو لازم تطلع فيزا زياره )
.
ولازم تكون حافظ اسم الوالد خماسي , ويكون معاك جنيه فكه وهتعرف ليه بعدين
المدة اللي بيطلع فيها التصريح الامني لتركيا فيزا تركيا و التصريح الأمني بتتراوح ما بين يومين لو انت امك دعيالك أو اسبوعين لو انت امك داعيه عليك يعني لازم تبوس ايد الحاجه قبل ما تروح المجمع

وبيكون صلاحيته شهرين يعني لازم تسافر خلال شهرين من استلامك للتصريح والا التصريح هيبقي لاغي وكانك معملتوش
.
طب افرض بعد كل دة معرفتش تطلع التصريح لاي سبب كان .. عندك حل من اتنين
1- تغمز حد من الامناء هناك الورقه ام 200 المتينه وهو يتصرف
2- تطلع من مصر بطيارتين منفصلتين علي اي بلد قريبه ( كوبري ) وبعدين من هناك ل تركيا زي دبي مثلا ولازم طبعا تكون عامل فيزا دبي الاول
================================================
عنوان السفاره
لو انت في القاهرة 25 شارع الفلكي، باب اللوق، السيدة زينب، محافظة القاهرة
وتروحها ازاي
بالمترو ل ميدان التحرير و اوصل عن الجامعه الامريكيه هتلاقي الناحيه التانيه هاردييز امشي في الشارع دا و خلى الجامعه على يمينك ادخل اول شارع على يمينك اللي هو شارع الفلكي
و امشي 7 دقايق او 10 هتلاقي السفاره على شمالك
لو انت في الاسكندريه ...باب شرق....قريبه جدااااا .من محطه القطار والموقف الجديد
================================================
اسئله بتتسأل كتير :
1- لو اتنين رايحين شهر عسل والاتنين طلاب او الاتنين حاصلين علي يعملوا ايه ؟؟
في الحاله دي واحد منكم هيطلع تأشيرة زياره بدعوة من شخص تركي
والتاني يطلع مرافق معاه
.
2- لو زوجك شغال في السعوديه ( اي دوله برا مصر ) وعايز يقدم من مصر يعمل ايه في جواب الاتش ار ؟؟
اتصلى بالسفارة اسالى ينفع زوجك يقدم خطاب صادر من السعودية ولا لأ .. هو العادي والطبيعي ينفع طالما هيطلع مختوم من هناك بس الافضل التأكد من السفاره جايز مبيقبلوش ورق سعودي في السفاره التركيه في مصر
.
3- انا طالبه وممعاييش حساب بنكي وفلوسي كلها كاش اعمل ايه ؟؟
الحل الاول تاخدي حساب باباكي او مامتك
الحل التاني تطلعي مع ايزيك وهي توفرلك الدعوة و وقتها بنسبه كبيرة مش هتحتاجي الحساب البنكي ( علي حسب مزاج القنصل وقتها )
.
4- انا طالب وعايز اسافر تركيا اعمل ايه ؟؟
هتطلع مع ايزيك او مع اي شركه سياحه تعملك دعوة عشان تطلع فيزا زياره
وبعد ما تطلع فيزا الزياره تروح بيها المجمع عشان تعمل تصريح امني
وبعد كدة تروح الهايكستب بتاع الجيش عشان تطلع تصريح السفر وخلي بالك بتطلعه في الاجازات بس ولو انت في اخر سنه في الكليه مش هتعرف تطلعه اصلا وملكش سفر , يعني سافر في اي سنه من سنين الكليه ماعدا اخر سنه
.
5- عايزة معاد قريب ضروري جدا في السفاره والمواعيد مقفوله لغايه نص اغسطس ؟؟
قدام السفاره فيه مكاتب بتوفرلك دعوات بيكونوا حاجزين مواعيد fake وبيغيروها وبيدوهالك , طبعا هيمصوا دمك وهيستغلوا حاجتك انك عايزة تسافري بسرعه بس الغاوي ينقط بطاقيته واللي قادر علي الكحل يتكحل
.
6- هل ممكن الدعوة اللي جايه من شخص تركي تترفض في السفاره ؟؟
ايوة طبعا في حاله ان الشخص اللي بيعمل دعاوي يكون محروق في السفاره , محروق في السفاره يعني السفاره عارفه انه بيعمل دعوات لكل الناس واي حد معدي من الشارع يعمله دعوه وبيعملها سبوبه عشان يكسب منها وبالتالي هو اتحرق خلاص في السفاره .. عشان كدة لازم تتأكد من شركه السياحه كويس اوي ان الشخص اللي هيعملك دعوة ميكونش محروق في السفاره
.
7- في سؤال في الابلكيشن بيقولك عملت تأمين السفر ولا لأ .. ولو عملته بيسألك عن تواريخ الصلاحيه بتاعته .. هل لازم اكون عامله قبل ما اسجل علي الموقع ولا اسجل الاول واقوله معملتش واخده معايا يوم المقابله ؟؟
الاحسن انك اول خطوة تعملها قبل ما تسجل الابلكيشن اصلا انك تكون عامل تأمين السفر وحجزت الفنادق والطيران المبدئي وبعدين تسجل عشان تكتب التواريخ كامله وتخلص نفسك
هو ينفع طبعا تقوله معملتوش وتسجل الاول وتعمله بعدين وتاخدة معاك يوم المقابله بس لو دي اول مرة ليك خليك في ال safe side واعمل تأمين السفر الاول قبل ما تملي الابلكيشن