كيف احسب تكاليف رحلتنا وعمل خطة سياحية بدون شخص او برنامج
إزاى نحسب تكاليف رحلتنا و نعمل خطة سياحية من غير ما نسأل حد
 |
| برنامج سياحي مجاني |
- فرحى قرب و عايز أسافر شهر عسل لدولة تكلفتها قليلة
- معايا 10 آلاف جنيه يكفوا أسافر بيهم برة ؟
- تكلفة السفر للبلد الفلانية كام ؟
- إيه أرخص بلد ممكن أسافرها ؟
- سعر تذكرة السفر كام ؟ عايز أحجز فندق بس ما يكونش غالى ؟
- أروح فين فى البلد الفلانية ؟
- آخد بوكيت منى معايا أد إيه ؟
- إزاى أخطط لسفريتى؟
كل الأسئلة دى و غيرها بتوصلنا بشكل يومى و متكرر ... و مالهاش إجابة واحدة أو محددة
يعنى قول لى حاجة فى المتوسط كده
و لا حتى متوسط واحد ... لأن فى حد المتوسط بتاعه 10 قروش و فى حد تانى المتوسط بتاعه 50 قرش
واحد بينزل فى فنادق خمس نجوم و واحد بينزل فى هوستل
حد بيسافر طيران إقتصادى و مايهمهوش لو قعد 20 ساعة ترانزيت عشان يوفر و حد بيفضل الطيران المباشر حتى لو دفع أكتر
فموضوع التكلفة ده موضوع نسبى ... بيختلف حسب الزمان و المكان و الأشخاص
البوست ده عشان كل شخص يقدر يحسب تكلفته بنفسه حسب الزمان و المكان و حسب تفضيلاته و الميزانية بتاعته
الأول لازم نعرف إن تكاليف السفر عبارة عن
- التأشيرة
- تذكرة الطيران
- الإقامة سواء فى فندق أو هوستل
- المزارات السياحية
- الإنتقالات الداخلية
- المصاريف الشخصية زى الأكل و الشرب
- الشوبينج
فى حاجات من اللى فوق دى ثابتة و لا مفر منها ... يعنى هتدفعها هتدفعها زى تذكرة الطيران و الإقامة و التأشيرة
و حاجات تانية ممكن تتحكم فيها أو تستغنى عنها خالص زى الشوبينج و المزارات إن شا لله حتى تقضيها مشى فى شوارع البلد براحتك ... و حاجات ممكن توفر فيها زى الإنتقالات و المصاريف الشخصية تركب باص بدل تاكسى ... تاكل من السوبرماركت بدل ما تاكل فى مطعم
أولا بالنسبة للتأشيرة فى حالة السفر لبلد لها تأشيرة
طبعا تكلفة التأشيرة بتختلف من بلد لبلد و ممكن نعرفها من على مواقع السفارات أو مواقع مكاتب التقديم التابعة لها
و بتشمل سعر التأشيرة نفسه + مصاريف ترجمة الورق لو أصله عربى و التأمين الطبى و الحجوزات المبدئية
ثانيا بالنسبة لتذاكر الطيران
لازم نعرف إن تذكرة الطيران دى سلعة مرنة بتخضع للعرض و الطلب ... يعنى إيه الكلام ده ؟
يعنى تذكرة الطيران مش أجرة موحدة زى تذكرة الباص أو المترو ... عشان كده لو روحت مكتب حجز و سألته عن سعر التذكرة هيسألك تاريخ الذهاب و العودة إمتى عشان يقدر يطلع لك السعر من على السيستم
نفس الشىء و إنت بتعمل بحث على أسعار التذاكر على النت لازم تدخل التواريخ
مش معنى إنك حاجز تذكرة economy إن كل الناس اللى معاك فى نفس الدرجة دافعين نفس السعر اللى إنت دفعته
ممكن تكون إنت دافع ألفين و اللى جنبك جايب نفس التذكرة بتلاتة و اللى وراك بخمسة
طيب إيه اللى عمل الفرق ده ؟ اللى عمل الفرق ده إن الـ economy مش درجة واحدة ... ده متقسم جوة درجات و كل درجة لها سعر لما بتخلص درجة بيتنقل للدرجة اللى بعدها ... ممكن إنت شارى تذكرتك من شهرين فلحقت تذكرة على السعر الرخيص و اللى جنبك حجز من يومين فاشترى بالسعر الغالى
المهم عشان مانسرحش فى حكاية تذاكر الطيران و درجاته لأنه محتاج موضوع لوحده فى حاجات ناخد بالنا منها و إحنا بنخطط للرحلة بتاعتنا
- نخطط و نحجز قبل السفر بوقت كافى لأن كل ما موعد السفر بيقرب كل ما السعر هيغلى خصوصا لو مسافرين فى وقت موسم سفر
- نقرا شروط و سياسة الإستبدال و الإسترداد و نفهمها كويس جدا
- مانحجزش أبدا تذكرة رخيصة غير مرنة إلا لو متأكدين تماما من مواعيد سفرنا عشان ماتضيعش علينا فلوس التذكرة لو كانت غير قابلة للإسترداد أو الإستبدال
- لو مسافرين ترانزيت نتأكد من موضوع إننا نقدر نعمل ترانزيت فى دولة الترانزيت عشان مانرجعش من المطار و ده ممكن نعرفه من الخطوط اللى مسافرين عليها لأن بيكون عندهم التعليمات
نخلى بالنا من الوزن المسموح بيه خصوصا لو مسافرين على طيران منخفض التكلفة
أهم المواقع بقى اللى ممكن نعرف منها الأسعار و نحجز من خلالها تذكرة الطيران
غالبية المواقع دى ممكن تحجز من خلالها طيران أو فنادق أو تأجر عربية و خدمات تانية كتير متعلقة بالسفر
نخلى بالنا من نقطة مهمة فى مواقع الحجز ... إن فى مواقع الحجز بيكون من خلال الموقع نفسه زى expedia مثلا البحث و الحجز و أى مشاكل بتحصل بيقوم بحلها
و فى مواقع تانية زى skyscanner دى مجرد موقع بحث ... هو بيعمل بحث فى كل المواقع المتوافرة و يعمل مقارنة و يجيب لك أرخصها
لكن لما تيجى تعمل الحجز الفعلى بيوجهك لأرخص مواقع تعمل من عليه الحجز و إنت تختار من مواقع الحجز دى.... و عشان كده لازم نخلى بالنا من المواقع دى و نتأكد إن عندهم خدمة عملا كويسة عشان لو حصلت مشكلة فى الحجز ... و يفضل طبعا لو كان فرق السعر بسيط بين أى موقع و موقع شركة الطيران نفسها يبقى نحجز من خلال شركة الطيران .....
طبعا فى مواقع تانية كتير للبحث عن الطيران هنلاقيها لو عملنا بحث على النت و ممكن ندخل على مواقع خطوط الطيران مباشرة من غير مواقع وسيطة ... بس غالبا الأسعار على المواقع دى بيكون أرخص من موقع شركة الطيران
لــــــــــــــــــــــــــــــــــحد هنا تمامممممممممممممممممممممممممممممممممممممممممممممممممممممممم
ثالثا الإقامة و حجز الفندق
------------------------
أسعار الفنادق بينطبق عليها نفس الكلام بتاع الطيران يعنى سعرها بيختلف حسب العرض و الطلب و حسب السيزون اللى مسافرين فيه ... و يفضل إن الحجز يكون قبل السفر بفترة كافية
من أشهر مواقع حجز الفنادق
طبعا
و للهوستلز
و للشقق و الغرف
دى بعض المواقع الموجودة و فى مئات المواقع غيرها ممكن نبحث عليها و نختار منها اللى يناسب ميزانيتنا ....
فى طبعا ناس بتسخدم couchsurfing للإقامة المجانية بس ده مش مجالنا فى البوست ده لأن ناس كتير إتكلمت عليه
رابعا المزارات السياحية
------------------------
أروح فين فى أمستردام ... أعمل إيه فى روما .... إقترحوا على برنامج لباريس
كل الأسئلة دى بيجاوب عليها مواقع كتير جدا على النت و بالأسعار كمان ... إنت مجرد ما بس تكتب things to do و إسم المدينة على مؤشر بحث جوجل هيطلع لك مواقع و مزارات لا تعد و لا تحصى ... المزارات السياحية فى منها المجانى و فى منها اللى برسوم للدخول
بعض المواقع على سبيل المثال لا الحصر
لو عايز متاحف موجود ... عاوز طبيعة موجود ... عايز جولات ثقافية موجود ... تقدر تختار الأنشطة اللى تتناسب مع إهتماماتك
خامسا الإنتقالات الداخلية
------------------------
الإنتقالات سواء كانت من مدينة لمدينة أو من مكان لمكان فى نفس المدينة فى كذا موقع ممكن نستخدمه و بيجب لنا كل البدائل المتاحة سواء طيران أو باص أو قطار أو مترو و بالمواعيد و الأسعار كمان
سادسا المصروفات الشخصية
----------------------------
مثال الأكل و الشرب دى ممكن نعرفها بشكل تقريبى من خلال مواقع زى
المصاريف دى ممكن تختلف من شخص لشخص ... ممكن حد يقضيها من الأكل الجاهز فى السوبرماركت و محلات الوجبات السريعة زى كنتاكى و ماكدونالدز فياكل فى اليوم كله بـ 10 يورو مثلا و ممكن ناس تانية بتحب الأكل و أنها تجرب أكلات جديدة فى مطاعم متوسطة فتصرف 20 أو 30 يورو فى اليوم
سابعا الشوبينج
--------------
و دى حاجة أنا ماليش فيها بصراحة ... أنا ممكن أشوف حاجة بالصدفة تعجبنى أشتريها ... لكن مش من الناس اللى بأسافر مخصوص عشان أعمل شوبينج
كل بلد لها الأسواق الخاصة بيها و الأوتليتس و المحلات المشهورة بأسعارها الرخيصة ... فى أوروبا مثلا فى محلات مشهورة هتلاقيها فى كل مكان مثال
- Primark
- H&M
- Bershka
- Zara
و محلات كتير هتكتشفوا أنها فى أوروبا مش براندات واو و لا غالية زى ما إحنا متخيلين فى مصر و أنها تندرج تحت بند الكساء الشعبى و المتوسط و كلها بتتصنع فى جنوب شرق آسيا و بتيجى رخيصة جدا عشان كده ممكن تلاقى جينز أو بلوفر بعشرة او عشرين يورو مثلا
هو فرق العملة بس اللى مخليها رخيصة عندهم و غالية عندنا ... أما محلات البراندات اللى بجد فهى ليست فى متناول يد المواطن العادى
فى مواقع ممكن تعمل travel plan كاملة بناء على تفضيلاتك
طيب تلخيص الكلام الكتير اللى فوق ده عشان الناس اللى تاهت مننا ... عايز تعرف السفرية هتكلفك كام ... عايز تعرف الفلوس اللى معاك هتكفى و لا لأ ... عايز تعرف الفلوس اللى معاك توديك فين
هتدخل تشوف أسعار الطيران و تشوف أسعار الفنادق و اسعار المزارات و تجمعهم على بعض يبقى كده عندك تكلفة مبدئية
و تشوف مصاريفك التانية اللى تقدر تتحكم فيها و تحسبها فى المتوسط و تحسب البوكيت منى اللى هتحتاجه هناك ....
-2022.jpg)
تعليقات
إرسال تعليق