التقرير الشامل عن رحلتي لجزيرة بوكيت

نوفمبر 08, 2018

التقرير الشامل عن رحلتي لجزيرة بوكيت

هتكلم عن ( التأشيرة _ الطيران_ الفنادق_ الرحلات _ الأكل _ المواصلات)

السفر إلي بوكيت

تقرير رحلتي الى بوكيت توجد الكثير من الاماكن السياحية في رحلتي الى بوكيت والعديد من المعالم التي تجذب السياح بقوة من كل بقاع العالم، فيما يلي نذكر نبذة عن أفضل تلك الأماكن وكيفية تنظيم برنامج سياحي في بوكيت امبارح أنا حطيت الموضوع من غير تفاصيل لكن بناءا على طلب الأدمن وطلب الأعضاء فهنزل ليكم التفاصيل

#التأشيرة

حجز مبدئي للفندق والطيران ، وخطاب من العمل ، وكشف حساب

ولو طالب مش مطلوب منه غير بس ورقة تثبت إنه طالب مع الحجوزات المبدئية

#تذاكر_الطيران

هتحتاج حجزين واحد دولي وواحد محلي

بالنسبة للدولي أنا حجزت على جولف اير ومش بنصح بيها إلا لو مفيش سعر أقل منها من السعودية ذهاب وعودة 508 دولار لإن المقاعد صغيرة والخدمة مش ممتازة وريحة الطيارة مش حلوة والوجبات مش حلوة .

المحلي في شركات كثيرة أكتر من 6 شركات مثلاُ ، بس خلي بالك إن في مطارين مش مطار واحد ، وانت بطبيعة الحال هتوصل على مطار سوفارنابومي الدولي يبقى تشوف الرحلة للبوكيت من نفس المطار ده

لإن المطار التاني بعيد وهيكلفك تاكسي بسعر محترم وساعتين عشان توصل مثلاُ بسبب الزحمة

انا مبدئياً حجزت على THAI ودي شركة فخمة وممتازة وسعرها 60 دولار شاملة الوزن 30 كيلو .

وخلي بالك اير اسيا لازم تدفع حق الوزن يعني سعر التذكرة غير شامل الوزن

حاول توصل بوكيت بالنهار عشان تقدر تلاقي تاكسي أو سيارة توصلك للفندق بسعر مناسب

لكن لو وصلت بالليل هتدفع أقل شئ 800 بات يعني 450 جنيه تقريباً لإن مفيش سيارات .

وممكن تشتري خط من المطار الدولي وقوله يعملك باقة انترنت لمدة شهر ب400 بات تقريباً .

#الفنادق

تقدر تستخدم بوكينج أو موقع أجودا

وبما انها جزيرة كبيرة فممكن تحجز الفندق قريب من شاطئ الباتونج وأنا حجزت في فندق اسمه (Platinum Hotel ) سعر الليلة لشخصين 18 دولار وهو فعلاً فندق ممتاز وموقعه كويس وأنصح بيه بشدة .

ولو هوستيل لشخص واحد هتلاقي اسعار رخيصة جداً ممكن اليوم ب50 جنيه مثلاُ.

#الرحلات رحلتي الى بوكيت شهر العسل

عندك كذا مكان بس أشهرهم بي بي أيلاند وفانتزيا شو وجيمس بوند ، تقدر تحجز لما توصل الفندق وتبدأ تشوفهم في الشوارع وتقارن الاسعار والبرامج

الاسعار متفاوته وممكن تسمع اسعار رخيصة وتنبهر بس الفخ إن مش كل سعر بيشمل كل حاجة

الاختلاف بيكون في الانش سريع أو بطئ

الاكل يشمل أو لا

التأمين

عدد الجزر اللي هتروحها

انا أخدت رحلتي ب1400 بات (42 دولار للشخص الواحد) بس شامله الاكل والشرب ولانش سريع و7 توقفات في 7 أماكن على جزيرة بي بي ايلاند) .

كمان مش لازم تروح مكان وكل الجزر لإن الموضوع ممتع بس متعب شوية ومجهد

ممكن تختار مكان واحد بس أو مكانين بالكثير

وتقدر تقضي بقية الأيام في الشاطئ أو الخروج في المنطقة واستكشافها

-----------------------------------------------------------------------

معلومة مهمة جداً جداً / لازم تستخدم في رحلتك كريم واقي للشمس عشان انا مرضت وفضلت 15 يوم بتعالج ودخلت المستشفى كمان لإني استهنت بالشئ ده

-----------------------------------------------------------------------

#الأكل السهرات في بوكيت

بالنسبة لمنطقة الباتونج

الأكل الحلال موجود بس المشكلة إما رخيص ومش نظيف(محلات شعبية) الوجبة الواحدة ممكن تكلفك 50 جنيه

أو نظيف وحلال بس غالي جداً (المطاعم العربية)

طبق واحد صغير مكرونة أو ساندوتش هيبدأ من 100 جنيه وعشان تاكل وتشبع هتدفع بتاع 200 جنيه

أو لو بتحب السمك تقدر تروح مطاعم عادية وتاكل فيها أسماك

بيبدأ من 50 جنيه

ياريت كمان يكون معاك شوية معلبات عشان هناك الجبنة عملة نادرة وغالية جداً على سبيل المثال الجبنة المثلثات ال8 قطع ب 100 جنيه العلبة :D

ممكن كمان تروح فاميلي ماركت أو 7 دايز وتدور على حاجات حلال للفطار والعشاء .

كنتاكي هناك حلال وده المفضل ورخيص مقارنة بغيره

وصب واي عندهم ساندوتش حلال ، وبيتزا هت الخضار ، وماكدونلز عندهم ساندوتش واحد حلال او ممكن سمك

اللي عايز يوفر في المصاريف ومعاه اسرة يقدر ياكل في المحلات الشعبية الرخيصة ويحاول يدور على حد اكله نظيف شوية ياكل من عنده دجاج ورز ويفطر ويتعشى في البيت .