17 نصائح للمسافرين وبيستخدموا بطاقات الائتمان او الخصم

نصائح للمسافرين وبيستخدموا بطاقات الائتمان او الخصم

حماية بطاقة الائتمان من السرقه

1. قبل ماتسافر بلغ البنك بتاعك اللي اصدر لك البطاقه وجهة سفرك وتاريخ السفر وتاريخ العوده ومهم جدا تبلغه البلد اللي انت مسافر ليها ولو اكتر من بلد تبلغه توقيتات الدخول والخروج لكل بلد
2. بطاقتك تكون معاك دايما وتحت ايديك وعينيك
3. و في مطعم او بتشتري حاجه ووقت الدفع لازم تكون عملية الدفع تحت عنيك وشايفها. ماتسبشي للجرسون في المطعم ياخود البطاقه ويروح يمررها علي ماكينه ال POS ويرجعلك بالبطاقه ويقولك مرسي او ثانك يوم. معظم الماكينات الان يتشتغل wireless فيجيبلك الماكينه لحد عندك
4. يفضل ان بطاقتك تكون ب chip مش magnetic strip لان الاخيره سهل عمل نسخه من البيانات بتاعتك من عليها وسرقتك.
5. يفضل ان بطاقتك تكون ب chip مش magnetic strip لان الاخيره سهل عمل نسخه من البيانات بتاعتك من عليها وسرقتك.
6. معظم البنوك الان بتبعت sms علي التليفون الموبايل اللي متسجل في البنك لحامل البطاقه بتنبهه بالعمليه التي تمت وشرح موجز للمكان اللي تمت فيه فلازم لو انت مسافر بره بلدك يكون معاك خط التليفون ده وعامل عليه خاصية التجوال علشان تكون مطلع عليه. الرساله اللي هاتجيلك مش هاتكلفك فلوس.
7.  لو جاتلك رساله بعمليه انت ماعملتهاش كلم ال call centre بتاع بنكك فورا. في رقم بيكون مكتوب علي ظهر البطاقه للاتصال من خارج بلدك وده بيعامل معامله خاصه بالرد السريع عليه.
8. - جواز سفرك معاك دايما لان في محلات كثيره بتطلب الاطلاع علي تحقيق الشخصيه لمستخدم البطاقه وده لمصلحتك.
9. البطاقات اللي بتطلب PIN code لاتمام العمليه ياريت وانت بتكتب الكود تخبي بايدك الاخري صوابعك وانت بتكتبه علشان ماحدش يشوف الكود مباشرة او من خلال كاميرات المراقبه المعلنه والمخفيه.
10. في حالة انك هتستخدم البطاقه في احدي ماكينات الصراف الالي لسحب مبلغ نقدي يرجي التاكد ان الغطاء الاخضر اللي في وجه الماكينه اللي بيتم ادخال البطاقه فيه مثبت جيدا ولايمكن خلعه وده انك بتمد ايدك قبل ما تدخل البطاقه وتشده لبره و تلفه يمين وشمال لان بعض اللصوص المحترفين بيركبوا واحد مستعار هو عباره عن سكانر بيتم من خلاله سرقة كل معلومات بطاقتك.
11. نفس الكلام عند التعامل مع ماكينة الصراف الالي ال ATM او ال ITM لازم تخبي كويس ايديك وانت بتكتب ال PIN code بتاع يطاقتك لان فيه كاميرات قد تكون معلنه او مرأيه لك ومنها بيتعرف الكود.
12. ماتكتبشي ال PIN code وتسيبوه في نفس المكان اللي فيه البطاقه. في ناس كانت بتكتبه علي البطاقه ولكن مع التحذيرات الصادره من البنوك بطلت تكتبه عالبطاقه وبتكتبه في مكان تاني بس بتشيله في نفس المحفظه او الشنطه وده خطر لان لا قدر الله لو الشنطه او المحفظه اتسرقت كلها صاحب البطاقه هايلبس في الحيط.
13. حاول يكون معاك كاش احتياطي دايما حاطه علي جنب علشان لو البطاقه فقدت او حصل فيها عطل فني ماتتسوحشي وانت بالخارج لحد ما مشكلتك تتحل اذا نفع انها تتحل من الاساس فامتبوظشي سفريتك بسبب بطاقه.
14. حاول يكون معاك بطاقتين ائتمان من بنكين مختلفين معاك وانت مسافر او علي الاقل بطاقة ائتمان وبطاقة خصم من نفس البنك. بطاقة الخصم دي معناهنا انها بتخصم مباشرة من حسابك في نفس لحظة المعامله مش بالآجل زي بطاقة الائتمان.
15. لو ادالك اختيارات تدفع بعملة البلد اللي انت فيها والا العمله المحليه لبلدك (الجنيه المصري) يفضل تدفع بتملة البلد علشان تبقي عارف انت صرفت كام وبعد كده البنك بتاعك في بلدك (مصر) هو اللي بيحول طبقا لسعر صرف اليوم الصادر من البنك او البنك المركزي.
16.  خود بالك ان فيه رسوم وعموله البنك بتاعك بيضيفها علي كل عمليه شراء او دفع انت بتعملها بالخارج علشان كده نصيحة اخويه من واحد اتبهدل سفر الدفع كاش احسن بكتير من استخدام البطقات لانك عارف انت اشتريت الحاجه بكام وخلص الموضوع . عيب الدفع انك بتمشي بكاش في جييبك.
17. لو ماشي بكاش ماتحطهوش كله في مكان واحد. حط شويه في جيبك اليمين وشويه في الشمال وشويه في كل جيب خلفي وشويه في الجاكيت. يعني وزع وقلل المخاطر الا اذا بأه حظك وقع في ناس ثبتوك وقالولك طلع كل اللي في جيبوك 🙈 كده العمر اهم 😁

كل بلاد العالم فيها لصوص وحراميه ونشالين ونصابين بل بالعكس في اوروبا وامريكا هم متقدمين في ده تكنولوجيا اكتر مننا بمرااااحل .

ربنا يسلمك وتسافروا ورجعوا بالسلامه.

تحياتي ودمتم مسافرين سعداء