طيران ال Low Cost السم في العسل

الطيران المنخفض التكلفه اوالي بيسموه (Low Cost) هي شركات طيران اقتصاديه للسفر بين الدول الاوروبيه ( Ryanair/ wizzair / easy jet) بأسعار تقريبا ببلاش  .. بس خلي باااااالك اوي وانت بتحجز تذكره علي الشركات دي اوعي تقع في الفخ

Low Cost

يعني لو لقيت تذكره من إيطاليا لفرنسا ب ٢٠ يورو اوعي تفرح وتنفذ التذكره من غير ما تقرا الكلام ده

صحيح الشركات دي بتقدم اسعار خياليه بمعني كلمه خياليه يعني ممكن تلاقي تذكره من اليونان لايطاليا بعشره يورو يعني أقل من تذكره الباص بس لازم تخلي بالك وانت بتحجز التذكره عشان متلاقيش نفسك في الاخر بتدفع أضعاف تمن التذكره

• اول حاجه تخلي بالك منها ( الوزن ) المسموح ليك عاده بيكون مسموح ليك بشنطه واحده بس ١٠ كيلو تطلع بيها الطياره يعني الأسعار بتكون غير شامله شنطه check in  وبالتالي لو معاك اكتر من شنطه يبقي مش هيكون مناسب تسافر علي الطيران ده والا هتدفع أضعاف تمن التذكره.
• خلي بالك ان الشركات دي مش بتتهاون ابدا في اي( جرام ) زياده ومعندهاش رحمه لو معاك كيلو واحد زياده 
•  لازم تعمل self check in قبل معاد الرحله ولازم تطبع البوردينج قبل ما توصل المطار  .. ولو معملتش كده بتدفع ٥٠ يورو غرامه .يعني ممكن التذكره كلها تكون ب ٢٠ يورو وتضطر تدفع ٥٠ يورو غرامه لو مطبعتش البوردينج
• خلي بالك ان التذاكر دي غير قابله للاسترداد او التعديل ( الا اذا اختارت اوبشن flixable )  وانت بتنفذ التذكره اونلاين وطبعا ده مقابل رسوم اضافيه ممكن توصل لقيمه التذكره نفسها 
• السعر غير شامل اي وجبات او خدمات او حته كوبايه ميه داخل الطياره  .. عشان كده خد معاك ساندوتشات او سناكس وانت مسافر علي الطيران ده 
• متستغربش وانت في الطياره لو لقيت حد سارح بسميط وبيض وجبنه او امشاط وفلايات  .هتلاقي المضيفين عاملين ازعاج طول الرحله عشان يبيعوا المنتجات اللي معاهم وساعات بيعملوا مزادات جوه الطياره .يعني مفيش هدوء 
•  لازم تتأكد ان السعر المعلن شامل اي ضرايب او رسوم ( مستخبيه ) ممكن تظهرلك فجأه وانت بتنفذ التذكره عشان متلاقيش نفسك لابس في الحيطه

شاهد ايضا

كيف احسب تكاليف رحلتنا وعمل خطة سياحية بدون شخص او برنامج

17 نصائح للمسافرين وبيستخدموا بطاقات الائتمان او الخصم

عايز تسافر اسطنبول وتعمل شوبنج ركز معايا

• معظم رحلات الطيران الاقتصادي مش بتسافر ولا بتوصل علي مطارات رئيسيه .وبتسافر وبتوصل لمطارات فرعيه ساعات بتكون في قري ومدن نائيه وبعيده يعني االي هتوفره في التذكره هتدفعه في المواصلات لوسط المدينه 
• معظم مواعيد الرحلات دي بتكون في منتصف الليل وبتوصل في اوقات صعبه بعد منتصف الليل او الفجر وبتضطر يا اما تاخد تاكسي لوسط البلد او تستني لحد ما الباصات او المترو  تبدأ في العمل 
•  الكراسي في الطيارات دي بتكون ضيقه جدا وغير مريحه .. عشان كده لو بتعاني من اي مشاكل في العمود الفقري انصحك بلاش خاصه لو فتره الرحله طويله .

الطيران الاقتصادي زي ما سعره خيالي فعلا لكن عيوبه كتيره ولازم تاخد بالك منها وانت بتحجز عليها